Нийслэлийн Засаг даргын захирамжаар 627 сая 570 мянган төгрөгийн үнэ бүхий 3 тээврийн хэрэгсэл болон нэмэлт тоноглолыг Монгол наадам цогцолбор НӨҮГ- т, 48 сая 350 мянган  төгрөгийн үнэ бүхий тээврийн хэрэгслийг Баянзүрх дүүргийн ЗДТГ-т, Бүгд найрамдах Солонгос улсын Өмнөд Генгсан мужийн Хаман сумаас хандивласан 69 сая төгрөгийн үнэ бүхий 3 тээврийн хэрэгслийг Хан-Уул дүүргийн Онцгой байдлын хэлтэс болон тус дүүргийн Нэгдсэн эмнэлгийн эзэмшилд олгохоор боллоо.

Улаанбаатар хотын Захирагчийн Наран дахь ажлын алба  “Цэнгэг усны нөөц, байгаль хамгаалах төв”-тэй хамтран “Гэр хорооллын хүрээлэн буй орчны тулгамдсан асуудал” сэдэвт сургалтыг зохион байгууллаа. Сургалтанд Сонгинохайрхан дүүргийн 5, 6, 7, 23, 27, 30, 31-р хороодын 30 иргэн хамрагдаж, хог хаягдлаас болж газрын гүний ус бохирдож ундны усны хүртээмж буурч байгаа тухай танилцуулсан юм.

Нийслэлийн нийгэм, эдийн засгийн зорилтот хөтөлбөр болон  Нийслэлийн Засаг даргын үйл ажиллагааны хөтөлбөрт тусгасны дагуу Хотын захиргаа, Нийгмийн Эрүүл мэндийн нийгэмлэгтэй хамтран Нийслэлийн 2013 оны “Эрүүл аюулгүй байдлын индекс”-ийн төслийн хэлэлцүүлгийг 2 дахь жилдээ зохион байгууллаа.

Улаанбаатар хотын Захирагчийн ажлын албанаас нийтийн эзэмшлийн гудамж, зам талбай цэвэрлэдэг шар хантаазтангуудын дунд “Хоггүй гудамж-Хоггүй хороо” болзолт уралдааныг 2 дахь жилдээ зохион байгуулж, уг уралдаанаас шалгарсан тохижилт үйлчилгээний ажилтануудыг хөгжингүй орноор аялангаа туршлага судлах эрхийн бичгээр шагнадаг. Өнгөрсөн жил тус уралдаанд шалгарсан 17 шар хантаазтанг Азийн бар  гэгддэг Хонконг, Сингапур улсруу аялуулж байсан бол энэ жил 24 ажилтнуудад Хонконг Сингапур улсруу аялах эрхийн бичгийг гардлаа.

УИХ-аар батлуулсан Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлага, Нийслэлийн Засаг даргын 2013-2016 оны үйл ажиллагаа хөтөлбөрт тусгасны дагуу Хотын захиргаанаас “Хотын үндсэн дүрэм”-ийг боловсруулж байна. Шат дараатайгаар хийгдэх уг ажлыг нийслэлийн иргэдэд танилцуулж, хэлэлцүүлэх санал авах ажлыг Нийслэлийн Засаг даргын Тамгын газраас зохион байгуулж байна. Налайх дүүрэгт Хотын үндсэн дүрмийн хэлэлцүүлэг боллоо.

Цахим системээр газар өмчлөлийн ажлыг эхний ээлжийн 5 байршилд явуулж дууссан. Харин цахим системээр сонгогдсон буюу газар өмчлөн авах эрхтэй болсон зарим иргэд заасан хугацаанд харъяа дүүрэгтээ хандан өргөдлөө өгөөгүй учраас сонгогдсон эрхийг нь хүчингүйд тооцож дахин сонгон шалгаруулалт явуулж байгаа юм. 2014 оны 11-р сарын 17-ны өдрийн байдлаар нийтдээ 2043 иргэн заасан хугацаандаа өргөдлөө өгөөгүй тул дахин сонгон шалгаруулалтыг сонгогдоогүй иргэдийн дунд  явуулсан.

Нийслэлийн эрчим хүчний байгууллагуудын өвөлжилтийн бэлтгэл ажилтай  Улаанбаатар хотын Ерөнхий менежер Б.Бадрал ажлын хэсгийн гишүүдийн хамт танилцлаа. “Цахилгаан дамжуулах үндэсний сүлжээ” Улаанбаатар салбар ТӨХК, Дулааны цахилгаан станц- 4, Дулааны цахилгаан станц 2 -ийн ажлын явцтай танилцсан юм. “ДЦС-4” ТӨХК суурилагдсан хүчин чадлыг 123 мвт-аар өргөтгөх төслийн хэрэгжилтийн явц, 210 мвт-ын дулааны дэд станц, нүүрсний нөөц, хими цехийн ажиллагааны байдлыг газар дээр нь үзүүлсэн байна.  ДЦС-4” ТӨХК суурилагдсан хүчин чадлыг 123 мвт-аар өргөтгөснөөр  250 мянган айл өрхийг цахилгаанаар, 15 мянган айл өрхийг дулаанаар хангагдах боломж бүрдэж байгаа юм.

Нийслэлийн Засаг дарга “Мал, тэжээвэр амьтдын тооллого явуулах тухай” А/965 дугаар захирамж гаргалаа. Захирамжаар Нийслэлийн нутаг дэвсгэрт байгаа мал, тэжээвэр амьтдын 2014 оны тооллогыг 12 дугаар сарын 07-ноос 17-ны өдрүүдэд явуулахаар боллоо. Тооллогыг нийслэлд удирдан явуулах комисс байгуулж, комиссын даргаар нийслэлийн Засаг даргын Экологи, ногоон хөгжлийн асуудал хариуцсан орлогч  Т.Бат-Эрдэнэ ажиллана.

Улаанбаатар хотын Захирагчийн ажлын албанаас “Улаанбаатар хотын нийтийн эзэмшлийн гудамж зам талбай, орон сууц, гэр хорооллын гэрэлтүүлгийг сайжруулах хөтөлбөр”-ийг Нийслэлийн Удирдлагын зөвлөлийн хурлаар оруулан хэлэлцүүллээ.  Хөтөлбөрийг Хотын Ерөнхий менежер Б.Бадрал танилцуулсан.

Улаанбаатар Хотын Ерөнхий менежер Б.Бадрал нийслэлийн эрчим хүчний байгууллагуудын өвөлжилтийн бэлтгэл ажлыг хангасан явцтай танилцлаа. Өнөөдөр “Улаанбаатар цахилгаан түгээх сүлжээ” төрийн өмчийн хувьцаат компани,”Улаанбаатар дулааны сүлжээ” ТӨХК, Дулааны цахилгаан станц 3-ТӨХК-ийн ажлын явцтай танилцсан. “Улаанбаатар цахилгаан түгээх сүлжээ” ТӨХК хэрэглэгчдээс гомдол санал хүлээн авах Call center төв, диспечерийн алба, ДЦС 3-ын өргөтгөл шинэчлэлийн ажлын явцаа газар дээр нь үзүүлсэн юм. Эдгээр байгууллагууд өвлийн их ачааллыг давах бэлтгэлээ 100 % хангасан талаараа танилцуулж байлаа.

Нийслэлийн Засаг даргын захирамжаар  Баянзүрх дүүргийн 13, 14 дүгээр хорооны нутаг дэвсгэр 14 дүгээр хороолол орчим 7,3 га-д хэсэгчилсэн ерөнхий төлөвлөгөөний дагуу гэр хорооллын дахин төлөвлөлтийн төсөл хэрэгжүүлэгчээр “ЗУРГААН ТАЛТ” ХХК,  Чингэлтэй дүүргийн 7 дугаар хорооны нутаг дэвсгэр “Монголын үндэсний олон нийтийн радио телевиз” орчим 4 га талбайд “БАСМАА КОНСТРАКШН” ХХК тус тус шалгарсныг батламжиллаа.

Монголын Нутгийн Удирдлагын Нийгэмлэгээс Нийслэлийн Гэмт хэргээс урьдчилан сэргийлэх ажлыг зохицуулах зөвлөлтэй хамтран “Гэмт хэргээс урьдчилан сэргийлэх чиглэлээр Нутгийн удирдлагын байгууллагуудын чадавхийг нэмэгдүүлэх зарим асуудал” сургалт семинарыг зохион байгууллаа. Тус семинарт НИТХ-ын дарга, Нийслэлийн Гэмт хэргээс урьдчилан сэргийлэх ажлыг зохицуулах зөвлөлийн дарга Д.Баттулга дүүргүүдийн  Иргэдийн Төлөөлөгчдийн Хурын удирдлагууд, төлөөлөгч нар оролцлоо.  Мөн Монгол Улсын Хууль зүйн яам /Хууль сахиулах бодлогын хэрэгжилтийг зохицуулах хэлтэс/, Улаанбаатар хотын Цагдаагийн газар /Гэмт хэргээс урьдчилан сэргийлэх хэлтэс/, Замын Цагдаагийн газар, МУИС-ын Хуулзүйн сургууль, НИТХ-ын дэргэдэх Иргэний зөвлөл, Монголын Оюутны Холбоо, Монголын Сурагчдын холбоо зэрэг гэмт хэргээс урьдчилан сэргийлэх чиглэлээр ажиллаж буй төрийн болон сургалт, эрдэм шинжилгээний, иргэд, олон нийтийн байгуулагууд оролцсон юм.

Улаанбаатар хотын 5 хоногийн цаг агаарын урьдчилсан мэдээгээр 11 дүгээр сарын 19, 20нд цас орж, салхи түр зуур 12-14 метр секунд хүртэл ширүүсч шороон болон цасан шуурга шуурна. Шөнөдөө Буянт-Ухаа, Тэрэлж, Багануур орчмоор 17-22 градус, бусад дүүргээр 11-16 градус,  өдөртөө 1-6 градус хүйтэн байна. Харин 11 дүгээр сарын 20, 23нд өдөртөө бага зэрэг хүйтэрнэ

Нийслэлийн Хүүхэд, гэр бүлийн хөгжлийн газраас хүчирхийллийн учир шалтгаан, хор хохирол, үр дагаврыг нийгэмд таниулах мөн урьдчилан сэргийлэх зан үйлийг бий болгоход  оюутан залуучуудын оролцоог нэмэгдүүлэх зорилгоор нийгмийн ажилтан бэлтгэдэг их дээд сургуулиудын 500 сайн дурын идэвхитэн оюутан залуучуудыг хамруулан “ХАЙРЫН ГАР” сайн дурын цугларалтыг зохион байгууллаа.

JCI Монгол байгууллага, Нийслэлийн ЗДТГ, Монголын Үндэсний Худалдаа Аж Үйлдвэрийн Танхимтай хамтран зохион байгуулж байгаа замын түгжрэлийг бууруулах чиглэлээр гарц шийдэл тодорхойлох “Хотын шийдэл” форум боллоо. Уг форумд Улаанбаатар хотын Захирагчийн ажлын алба, Нийслэлийн Замын Цагдаагийн газар, Ерөнхий төлөвлөгөөний газар, Мэдээллийн Технологийн газар, Боловсролын газар, Гудамж төсөл, Зам тээврийн яам зэрэг төрийн болон төрийн бус байгууллагын төлөөлөл, эрдэмтэн судлаачид, бизнес эрхлэгчид, иргэдийн төлөөлөл оролцлоо.

Улаанбаатар хотын авто зам, замын байгууламжийн засвар, арчлалтын ажлыг “Нийтийн үйлчилгээний Улаанбаатар нэгтэл” ОНӨААТҮГ нийслэлийн замын сангийн хөрөнгөөр хийж гүйцэтгэдэг. Уг ажлын хүрээнд авто замын нөхөөс, хайс хашлаганы засвар, арчлалт, гүүр хоолойн урсгал засвар, авто замын хөдөлгөөн зохицуулах тэмдэг, тэмдэглэгээний нөхөн сэргээлтийн ажлыг хийж гүйцэтгэж байна.

УИХ-аар  батлуулсан Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагын баримт бичгийг хэрэгжүүлэх ажлын хүрээнд Нийслэлийн ЗДТГ, Жайка олон улсын байгууллагатай хамтран “Улаанбаатар хотын хөгжлийн ерөнхий төлөвлөгөөг хэрэгжүүлэх, чадавхийг сайжрууулах” төсөл, семинарыг зохион байгууллаа. Тус семинарт Нийслэлийн Засаг дарга бөгөөд Улаанбаатар хотын Захирагч Э.Бат-Үүл, Нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат, Нийслэлийн Зураг төслийн хүрээлэнгийн Ерөнхий менежер Г.Нарангэрэл,  ЖАЙКА-гийн Монгол дахь Төлөөлөгчийн газрын дарга Като Тошинобу, Япон Улсын Саппоро хотын захиргааны Хотын шинэчлэл, хөгжлийн албаны менежер Цүбота Ясуши болон холбогдох албаны төлөөлөгч нар оролцлоо.

Нийслэлийн Засаг дарга “Нийслэлийн Аялал жуулчлалын зөвлөл байгуулах тухай” А/956 дугаар захирамж гаргалаа. Захирамжаар Нийслэлд аялал жуулчлал хөгжүүлэх бодлого зохицуулалтыг хэрэгжүүлэх, салбар хоорондын уялдааг хангах чиг үүрэг бүхий “Нийслэлийн Аялал жуулчлалын зөвлөлийн ажиллах журам, бүрэлдэхүүн”-ийг баталлаа. Тус зөвлөлийн даргаар Нийслэлийн Засаг дарга бөгөөд Улаанбаатар хотын Захирагч Э.Бат-Үүл, орлогч даргаар нийслэлийн Засаг даргын нийгмийн хөгжлийн асуудал хариуцсан орлогч Ц.Энхцэнгэл, нарийн бичгийн дарга нь Нийслэлийн Аялал жуулчлалын газрын дарга Э.Баттулга ажиллана.

Нийслэлийн Иргэдийн Төлөөлөгчдийн Хурлын дарга Д.Баттулгын урилгаар БНСУ-ын Кёнсанбүг мужийн ИТХ-ын дарга Жан Дэ Жин тэргүүтэй төлөөлөгчид Улаанбаатар хотод айлчлал хийж байна. Айлчлалын хүрээнд төлөөлөгчдийг Нийслэлийн ИТХ-ын дарга хүлээн авч уулзлаа.
Уулзалтаар Нийслэлийн ИТХ болон БНСУ-ын Кёнсанбүг мужийн ИТХ хооронд харилцаа, хамтын ажиллагаа тогтоох тухай санамж бичгийг байгууллаа. Санамж бичгийн хүрээнд хоёр тал харилцан ашигтай, эрх тэгш байдлын зарчмаар нөхөрсөг харилцаа, хамтын ажиллагаагаа хөгжүүлж, нийтлэг сонирхож буй асуудлаар хамтран ажиллах, тогтмол харилцан айлчлал хийж байх юм.

Нийслэлийн Засаг Дарга бөгөөд Улаанбаатар хотын захирагч Э.Бат-Үүл “Хөрөнгө бүртгэлээс хасах тухай” А/951 дүгээр захирамж гаргалаа. Захирамжаар шинээр спорт, сургалт үйлдвэрлэлийн төвийн барилга барихтай холбогдуулан нийслэлийн Мэргэжлийн хяналтын  газрын улсын байцаагчийн дүгнэлтийг үндэслэн Баянзүрх дүүргийн Хүүхэд, гэр бүл хөгжлийн “Өнөр бүл” төвийн балансад бүртгэлтэй Баянзүрх дүүргийн 16 дугаар хороонд байрлах автогражийн нийт 12 сая 169 мянган төгрөгийн үнэ бүхий байрыг акталж, нийслэлийн өмчийн бүртгэлээс хасахаар боллоо.