Энэ жил гэрэлтүүлгийн  чанарт онцгой анхаарч ажиллана  гэдгээ Нийслэлийн захирагчийн ажлын албаны хот нийтийн аж ахуй  хэлтсийнхэн илэрхийлэв.  Тус хэлтсээс “Чанар манай зорилт”  ажил хэргийн уулзалт зохион байгуулж байна. 2012 онд нийслэлийн гэрэлтүүлэгт 9 тэрбум төгрөг зарцуулахаар болжээ. Энэ хөрөнгийг чанартай, үр ашигтай зарцуулах нь чухал гэж Хот нийтийн аж ахуйн хэлтсийн дарга н. Тунгалаг хэлэв. Өнгөрсөн хугацаанд хотын гэрэлтүүлгийг “Цахилгаан тээвэр”, “Гэрэлтүүлэг чимэглэл” компаниуд хариуцдаг байсан бол өнгөрсөн жил уг ажлыг дүүргүүдэд хариуцуулсан байна.  Нэгэнт ажил хариуцахаар хүлээж авсан бол үүрэг хариуцлага ч өндөр байх ёстойг тэрбээр анхаарууллаа. 2011 онд Улаанбаатар хотын төв замуудад өрнөсөн  зам засварын өргөтгөл цаг хугацаандаа дуусаагүйгээс гэрэлтүүлгийн ажил он дамжихад хүрсэн. Уг нь нийслэлийн гэрэлтүүлгийг 95-100 хувь асаах боломж бийг онцлов. Хот нийтийн аж ахуйн хэлтсээс санаачлан зохион байгуулсан энэхүү уулзалтыг 2 сар тутамд зохион байгуулж байна. Дараагийн удаад дүүргүүд хотын гэрэлтүүлгийн асалтын хувь, чанарын  талаар мэдээлж, гарсан зөрчлөө дор бүр нь арилгаж байх юм.