Хүрээг Монгол Улсын нийслэлээр тунхагласны 100 жилийн ойн арга хэмжээг зохион байгуулах нийслэлийн ажлын төлөвлөгөөнд тусгагдсны дагуу Архивын Ерөнхий газар, Монголын Үндэсний музей, Нийслэлийн Архивын газраас хамтран “Нийслэл-Хүрээ 100 жил” сэдэвт архивын баримт, үзмэрийн үзэсгэлэнг 2012 оны 02 сарын 07-ны өдөр Монголын үндэсний музейд зохион байгуулан гаргахаар төлөвлөж байна. Энэхүү үзэсгэлэнд Үндэсний төв архив, Монголын үндэсний музей, Нийслэлийн Архивын сан хөмрөгт хадгалагдаж буй нийслэлийн түүхэнд холбогдох баримт, эд өлгийн зүйл тавигдахаас гадна байгууллага, иргэдийн гар дээр хадгалагдаж буй нийслэлийн түүхтэй холбогдох хосгүй үнэт, нэн үнэт, ховор нандин баримт бичиг, кино, гэрэл зураг, дуу авиа, дүрс бичлэгийн баримтыг сонгон шалгаруулан үзэсгэлэнд тавьж олон нийтэд сурталчилна. Тус үзэсгэлэнд оролцох хүсэлтэй байгууллага, иргэд Нийслэлийн Архивын газрын                                       

Вэб сайт: www.archiv.ub.gov.mn, 324223, 315066 дугаарын утсаар болон энд дарж холбогдох мэдээлэл авч болно.

“НИЙСЛЭЛ-ХҮРЭЭ”-Г ТУНХАГЛАСНЫ 100 ЖИЛИЙН ОЙН ҮЗЭСГЭЛЭНД  ТАВИХ БАРИМТ СОНГОН ШАЛГАРУУЛАЛТ

Архивын хосгүй үнэт, нэн үнэт, ховор нандин баримт нь Монголын болон нийслэлийн ард түмний оюуны үнэт өв, түүх, соёлын дурсгалт зүйлд хамаарагдах соёлын өвийн бүрэлдэхүүн хэсэг юм.

    Баримтын агуулга:

Нийслэлийн түүх, соёлын чухал ач холбогдолтой мэдээлэл үйлдсэн байх.

    Нэг. Баримтанд тавигдах шаардлага, шалгуур, үзүүлэлт

1.1.Баримтын төрөл зүйл:

    Цаасан суурьтай
    Кино
    Дуу авиа
    Дүрс бичлэг
    Машинаар уншигдах баримт
    Дүрслэлийн баримт
    Даавуун суурьтай баримт гм

1.2.Баримт тодорхойлох үндсэн шалгуур үзүүлэлт:

•    Баримтын түүхэн он, цаг
•    Түүх, соёл, шинжлэх ухаан, түүхэн танин мэдэхүйн чухал ач холбогдолтой
•    Нийслэлийн түүхийн чухал эх сурвалж
•    Жинхэнэ эх баримт буюу эх баримтанд тооцогдох цорын ганц хуулбар хувь байх
•    Бүтээн бий болгосон аргын хувьд өөрийн гэсэн өвөрмөц онцлогтой, үнэт материалаар хийгдсэн байх
•    Бусад шинжүүд /баримтын хими, физик, механикийн шинж чанар, гадаад онцлог гм/

1.3.Баримт бичгийн үнэ цэнийн үзүүлэлт:

•    Баримтын хууль зүйн хүчин төгөлдөр байдал
•    Баримтад нийгэм, улс, төр, эдийн засаг, соёлын харилцаа болон түүхийн онцлог чухал үйл явдлыг тусгасан эсэх
•    Түүхэн бие хүмүүст хамааралтай эсэх
•    Баримт бичгийг зохион бүрдүүлсэн байгууллага, хүний нийгэмд гүйцэтгэсэн үүрэг, байгууллагын ач холбогдол, зэрэглэл, статус
•    Баримтын уран сайхны болон хэлний онцлог
•    Бусад баримтад мэдээлэл давхардсан эсэх

1.4. Баримтаа шалгаруулж, үзэсгэлэнд оролцох:

o     Иргэд, төрийн бус байгууллага, төрийн бус архив нь хосгүй үнэт, нэн үнэт, ховор нандин баримтын жагсаалт болон өргөдөл, албан бичгээр үзэсгэлэнд ямар хэлбэр /баримтаа худалдах, гэрээгээр/-ээр оролцох талаар тодорхой бичиж Нийслэлийн Архивын газарт ирүүлнэ.

o    Нийслэлийн Архивт хөмрөг үүсгэгч байгууллагууд нь хосгүй үнэт, нэн үнэт, ховор нандин баримтын жагсаалтаа байгууллагын дэргэдэх ББНШК-н хурлаар хэлэлцүүлж хурлын тэмдэглэл, баримтын талаар тухайн салбарын мэргэжилтнүүд, түүх судлаачдаас гаргасан үнэлэлт, дүгнэлт, тодорхойлолтыг албан бичигт хавсарган Нийслэлийн Архивын газарт ирүүлнэ.
 
Хоёр. Баримт хүлээн авч шалгаруулах, үзэсгэлэнд тавих

2.1.Байгууллага, иргэдээс тус үзэсгэлэнд оролцох талаарх хүсэлт, холбогдох баримт бичгүүдийг 2012 оны 01 сарын 25-ны дотор Нийслэлийн Архивын газрын Ажлын хэсэгт ирүүлнэ.

2.2.Ажлын хэсэг нь хүлээн авсан хосгүй үнэт, нэн үнэт, ховор нандин баримтыг шалгуур үзүүлэлтийн дагуу шалгаруулна.

2.3.Шалгаруулахаар ирүүлсэн баримтуудыг холбогдох санал хүсэлт, шалгуур, үзүүлэлтийн дагуу хэрхэн шийдвэрлэсэн эсэхээ ирүүлсэн өдрөөс хойш 2 хоногт багтаан байгууллага, иргэнд мэдэгдэнэ.

2.4.Үзэсгэлэнд тавих, төрийн архивт шилжүүлэх баримтын “Тайлбар”, “Танилцуулга”, “Хөрвүүлэг” зэрэг холбогдох баримт, материалыг ирүүлэхээс гадна тухайн баримтанд тавигдах тусгай нөхцөл, шаардлага, хадгалалт хамгаалалтын санал, дүгнэлтийг баримтын хамт ирүүлнэ. Баримтын тээвэрлэлтийн асуудлыг тухайн байгууллага, иргэн хариуцана.

2.5. Нийслэлийн Архивын сан хөмрөгт хосгүй үнэт, нэн үнэт, ховор нандин баримтаа хадгалж хамгаалуулах, үзэсгэлэнд оролцох байгууллагатай тусгай гэрээ байгуулна.



НИЙСЛЭЛИЙН АРХИВЫН ГАЗАР