Оюутнууд болоод эмзэг бүлгийнхэн  өндөр настнуудын нийтийн  тээврээр зорчих  тасалбарт жил бүр төсвөөсөө 30 гаруй тэрбум төгрөг цацдаг нийслэл ирэх жилээс энэ дарамтаас салгаж өгөхийг Сангийн яамнаас хүсэж байна. Өнөөдөр тус яамны төрийн нарийн бичгийн дарга Б. Баттөртэй уулзахдаа Нийслэлийн Засаг даргын Нэгдүгээр орлогч Б. Баатарзориг энэ хүсэлтээ тавьж байна.  Өөрөөр хэлбэл асуудлыг салбарын санхүүжилтээр шийдвэрлэж өгөхийг хүссэн юм.  Оюутнуудын нийтийн тээврээр зорчих  тасалбарын санхүүжилтийг боловсролын  сайдын багцаас харин өндөр настан болон эмзэг бүлгийнхэнийг  нийгмийн хамгаалалын сайдын багцад шилжүүлж өгөхийг хүслээ.

АНУ-ын Денвер хот дахь Монгол Улсын өргөмжит консул  Жим Вагенландер  энэ зуныг Улаанбаатар хотод өнгөрөөж байна.  2 хотын харилцаа, хамтын ажиллагааны төлөө сэтгэл зүрхээ зориулж суудаг энэ эрхэм өнөөдөр Нийслэл Засаг даргын Нэгдүгээр орлогч Б.Баатарзоригтой  уулзаж  ах дүү хотуудын харилцаагаа өргөтгөх талаар ярилцсан.  Юун түрүүнд хүүхэд солилцооныхоо тоог нэмэгдүүлэх талаар хөндлөө.  Одоогоос 5 жилийн өмнөөс эхлэн Улаанбаатар хотын 1 дүгээр дунд сургуулиас 2 хүүхэд, 1 багш Денверт богино хугацааны сургалт, амралтад хамрагдаж байгаа аж.  Мөн хөдөө орон нутгаас Дундговь аймгийн Мандалговь сумын сурагчид Денверт амардаг юм байна.

Өнгөрсөн долоо хоногийн нийслэлийн удирдлагуудын шуурхай зөвлөгөөн дээр Засаг дарга Г.Мөнхбаярын анхааруулж, чухалчлан өгсөн үүрэг даалгаврын нэг зам засварын ажлыг эрчимжүүлэх, ашиглалтад өгөх. Өөрөөр хэлбэл, энэ сарын 25 гэхэд Улаанбаатар хотод гүйцэтгэж байгаа замын бүх ажил дууссан байх ёстойг сануулсан юм. Салбар хариуцсан нийслэлийн Засаг даргын орлогч нар,  Авто замын газрын дарга, нийслэлийн ерөнхий инженер, архитектор гээд холбогдох албан тушаалтнуудад үүрэг өгч, хийж байгаа хийхээр төлөвлөсөн, дууссан ажлын жагсаалт, ажлын төлөвлөгөөг нарийвчлан  гаргахыг үүрэгдсэн юм.
Харин хотын даргын Улаанбаатарын замыг өөрчлөх, шинэчлэх, нийслэлийнхний ая тухтай амьдрах орчныг бүрдүүлэх, хичээлийн шинэ жилээс өмнө зам засварын ажлыг дуусгах төлөвлөгөө эхнээсээ хэрэгжиж эхэллээ. Нийслэлийн Баянзүрх дүүрэгт хоёр ч зам өнөөдөр нээлтээ хийсэн юм.

Энэ жил нийслэл хотод бүтээн байгуулалтын ажил өрнөж байгаагийн дийлэнх хэсгийг зам барилга эзэлж байна. Ялангуяа нийслэлийн удирдлагууд гэр хороолол доторх замд анхаарал хандуулснаар өнөөдөр  Баянзүрх дүүрэгт 2 зам ашиглалтад хүлээн авлаа. Тус дүүргийн 12  дугаар хорооны нутаг дэвсгэрт байрлах  Жанжин клуб нь Монгол Улсын түүхтэй  салшгүй  холбоотой.  Ардын хувьсгалын ойн түүхэн ялалт,  онцлог үйл явдал өрнөж  байсан энэ газарт одоо  ШУА-ийн харьяа Ботаникийн хүрээлэн байхын зэрэгцээ Баянзүрх дүүргийн 12 дугаар хорооны иргэд амьдарч байна.  Гэр хорооллын иргэдийн ая тухтай амьдралын төлөө 0,8 км урттай хатуу хучилттай замыг Наранбулаг ХХК чанарын өндөр түвшинд хүлээлгэн өглөө. 

Нийслэлийн  Баянзүрх дүүргийн нутаг гэр хороолол дунд тавигдсан бас нэг зам бол тус дүүргийн 2 дугаар хороо  Кино үйлдвэрээс хойш 270 метр урттай шулуун зам юм.  Хоёр жилийн өмнө эхэлсэн энэ ажил иргэд газар чөлөөлж өгөхгүйгээс шалтгаалан цаг алдсан ч өнөөдөр энэ замаар автомашин давхиж эхэлж байна. Ердөө арав гаруйхан хоногийн өмнө сүүлчийн айл газраа чөлөөлж өгснөөр жолооч нар заавал Цайз зах, Офицеруудын ордон тойролгүйгээр Энхтайвны өргөн чөлөөнөөс Кино үйлдвэрээр эргэж арын зам руу давхих боломжтой боллоо. Сансараас Цайз зах руу орох замын дунд хэсэгт буюу  гэр хороолол дунд хөндлөн авто зам гаргаснаар автозамын ачаалал, хөдөлгөөний түгжрэл  эрс буурна гэдгийг мэргэжилтнүүд тооцоолжээ. Нийслэлийн Засаг даргын орлогч Б.Мөнхбаатар “Тус зам нь ус зайлуулах хоолойтой болохоор  үерийн аюулаас оршин суугчдыш урьдчилан сэргийлж чадсан” гэсэн юм.

“Улаанбаатар хотын аялал жуулчлал -2015” хөтөлбөрийг хэрэгжүүлэх үйл ажиллагааны төлөвлөгөөнд тусгагдсаны дагуу аялал жуулчлалын бүтээгдэхүүний нэр төрлийг олшруулах чиглэлээр Улаанбаатар хотод олон улсын чанартай тэмцээн уралдааныг зохион байгууллаа. Аялал жуулчлалын шинэ бүтээгдэхүүнийг нэмэгдүүлэх, хотын аялал жуулчлалын гадаад, дотоод сурталчилгааг хөгжүүлэх, Монгол-Японы найрамдалт харилцаа, хамтын ажиллагааг өргөжүүлэх, хүн амын бие бялдрыг чийрэгжүүлэх зорилготой марафон гүйлт боллоо.

Япон улсаас Монгол Улсад суугаа Онц бөгөөд Бүрэн Эрхт Элчин сайд Кидокоро Такүо, Баянзүрх дүүргийн Засаг дарга Б.Батзориг нар Япон улсын Элчин яаманд Япон улсын Засгийн газраас Монгол Улсад хэрэгжүүлж буй буцалтгүй тусламжийн “ Өвсний үндэс-хүний аюулгүй байдлыг хангах” хөтөлбөрийн хүрээнд хэрэгжүүлэх хоёр төслийн гэрээнд гарын үсэг зурлаа. Эдгээр төсөл нь нийт  180 мянган ам доллар буюу ойролцоогоор  250 гаран сая төгрөгийн санхүүгийн тусламж үзүүлэх юм. Япон Улсын Засгийн газрын “ Өвсний үндэс-хүний аюулгүй байдлыг хангах” хөтөлбөр нь хөгжиж буй орнуудын ард иргэдэд шууд үр ашгаа өгөх, иргэдийн хэрэгцээнд тулгуурласан тусламж үзүүлэх зорилготой 1989 оноос хэрэгжиж эхэлсэн систем юм.

Хотын дарга  Г.Мөнхбаярын үед хийгдэж буй хамгийн том ажлуудын нэг нь хөрсний усыг орон сууцны барилгуудын 00-ийн өрөөнд ашиглах явдал юм.  Одоогийн байдлаар техник эдийн засгийн үндэслэл хийгдэж эхэлсэн энэ ажилд 1 тэрбум төгрөг зарцуулахаар төсвийн тодотголоор батлуулаад байна.  Энэ ажлыг гардан хариуцаж буй НХОГ-ын хөрөнгө оруулалт, хяналтын инженерүүдтэй хотын мээр нүүр тулсан уулзалт зохион байгууллаа.  Хотын дарга мэргэжил нэгт нөхдүүдтэйгээ  ярилцах үеэрээ тэдэнд  хариуцаж байгаа  бүх ажлаа эрчимжүүл гэдэг үгийг онцолсон.  Энэхүү уулзалтын эцсийн гол үр дүн нь ажил сайжрах, ажлын үр дүн сайн байх учиртай гэж тодотголоо.
Улаанбаатар хотын хувьд анх удаа хөрсний усыг барилга байгууламжуудад ашиглах гэж  байна.  Энэ бол маш том дэвшилтэт ажил,  хотын хөгжилд эргэлт болсон ажил гэв. Түүнчлэн гэрэлтүүлэг чимэглэлийн талаар хөрөнгө оруулалтын инженерүүдтэй санал бодлоо солилцлоо.