Улаанбаатар хотын гурван дүүргийн гэр хорооллын тодорхой хэсгийн айл өрхүүдэд үртсэн түлш хэрэглүүлэх, МСС-гийн төслөөр олгох шинэ зуухаар хангах, цахилгаан халаагуур тавих зэргээр утааг багасгах, хотод  агаарын бохирдол нэмж үүсгэхгүй байх зорилгоор шинээр баригдах эрчим хүчний эх үүсвэрийг Багануур дүүрэгт байгуулахаар боллоо. Мөн Туул голыг хамгаалах хүрээнд “Харгиа” цэвэрлэх байгууламжид хийх  шинэчлэлийг түргэтгэх зэрэг асуудлаар Нийслэл, Байгаль орчин, аялал жуулчлалын яамныхан ярилцаж нэгдсэн шийдэлд хүрлээ.
УИХ-аар баталсан “Шинэ бүтээн байгуулалт “дунд хугацааны зорилтот хөтөлбөрийг хэрэгжүүлэх хүрээнд ийнхүү Нийслэлийн Засаг дарга бөгөөд Улаанбаатар хотын Захирагч Г.Мөнхбаяр, Байгаль орчны сайд Б.Гансүх нар ажлын уулзалт хийж асуудлуудыг шийдвэрлэлээ. Уулзалтад нийслэл, яамны холбогдох мэргэжлийнхэн болон Засаг даргын орлогч, хэлтэс, агентлагийн дарга нар оролцож хотоос боловсруулан УИХ-д оруулсан “Утаагүй Улаанбаатар “ төслийн нэр өөрчлөгдсөн ч дотооод асуудлууд бүрэн тусгагдсан энэ хөтөлбөрийг хэрхэн бодит ажил болгох, эхний ээлжинд шийдвэрлэх асуудлуудын талаар ярилцаж, хэрэгжүүлэх ажилдаа орохоор боллоо гэж Нийслэлийн Хэвлэл мэдээллийн албанаас мэдээллээ.

...Хамгийн гол нь чанар. Тэр тусмаа тохижилтын ажилд түлхүү анхаарах ёстой. Орхигдуулж ерөөсөө болохгүй. 100 айлын замын тендерт ялж, ажлаа гүйцэтгэсэн дөрвөн компанийн тохижилтын ажлын гэрээг цуцалсан. Дүүргүүдийн ТҮК-иуд үргэлжлүүлэн гүйцэтгэж байгаа. Тиймээс зөвхөн зорчих хэсэгт анхаарах бус явган хүний зам, гэрэлтүүлэг, ус зайлуулах шугам хоолойн ажлаа сайн гүйцэтгээрэй хэмээн Нийслэлийн Засаг даргын орлогч Б.Мөнхбаатар хэллээ. Тэрбээр Гэсэр сүмээс Бизнес хөгжлийн төв хүртэлх 1 км гаруй замын ажил, Баруун 4 замаас Баянбүрдийн тойрог хүртэлх замын ажилтай танилцсан юм.

100 айлаас Баянбүрдийн уулзвар буюу Цагдаагийн гудамжны зам засварын ажлыг гүйцэтгэж буй автозамын 4 компанид тавьсан шаардлагаа хотын мээр хэрэгжүүллээ.  Бүтэн  2 жилийн турш дөрвийн дөрвөн компани ажилласан хирнээ өнөө болтол явган хүний зам болон гэрэлтүүлэгийг дуусгахгүй “гурилдаж” байгаа тул ийнхүү гэрээг нь цуцалж байна.  Зам тавина гэдэг бол татвар төлөгчдийн мөнгийг гарын салаагаар урсгаж хагас дутуу ажил  хийхийн нэр огт  биш. Ажлыг чанарын өндөр түвшинд гүйцэтгэл сайтай хийхгүй байгаа хэнбугайтай ч хатуу хариуцлага тооцно гэдэг зарчим дээрээ Улаанбаатар хотын захирагч Г.Мөнхбаяр хатуу зогсож байна. 

Жижиг дунд үйлдвэрлэлийг дэмжихэд Засгийн газраас анхаарал  тавьдаг болсноор өнгөрсөн жил 30 тэрбум төгрөг энэ төрлийн бизнес эрхлэгчдэд зээл болон очсон билээ. Харин энэ жилийн тухайд зээлийн хэмжээ буурсныг Нийслэл хотод хуваарилсан 6 тэрбум төгрөгнөөс харж  болох нь. Нийслэлийн засаг даргын тамгын газар үйлдвэрлэлийн  хэлтэст 837 төсөл ирснээс 714-ийг нь шалгаруулж арилжааны 3 банкинд явуулсан талаархи мэдээллийг тус газрын дарга  Д.Бямбасайхан Нийслэлийн иргэдийн хурлын  төлөөлөгчдөд  өгөв.  Жижиг дунд үйлдвэрлэл эрхлэгчдэд Голомт, Улаанбаатар, Капитрон гэсэн 3 банк зээл олгосон байна. 

Удахгүй ирэх жилийн төсвийн асуудал яригдаж эхэлнэ. Хүн амын тал хувь нь амьдарч буй нийслэлд хийх ажил их ч хэрэгжүүлэх санхүүжилт хүрэлцээгүй байдаг. Иймээс нийслэлийн удирдлагууд тулгамдсан олон асуудлыг шийдвэрлэх  үүднээс эртнээс хөрөнгө санхүүгийн боломжийг хайж эхэлжээ. Нийслэлийн Засаг даргын санхүү, эдийн засгийн асуудал эрхэлсэн нэгдүгээр орлогч Б.Баатарзориг Сангийн сайдтай уулзаж, ирэх жилийн төсвийн талаарх саналаа танилцууллаа. Улаанбаатар хотод эн тэргүүнд тулгамдаж буй асуудлуудыг шийдвэрлэхэд нийтдээ 798 тэрбум төгрөг шаардлагатай гэсэн тооцоо бий.

Сар бүрийн сүүлийн долоо хоногийн бямба гарагийг нийтийн их цэвэрлэгээний өдөр болгон хэвшүүлэхээр нийслэлийн удирдлагууд тогтсон. Өнгөрөгч шуурхай зөвлөгөөний үеэр хотын ерөнхий менежер нийтийн эзэмшлийн гудамж, зам талбайн  ногоон байгууламжид ургасан шарилж, лууль цэвэрлэх ажлыг зарласнаар өнгөрсөн 14 хоногт хотод хог цэвэрлэх аян өрнөжээ. Энэхүү их цэвэрлэгээгээр 637015 метр кв талбайд 4306 хүн ажиллуулж нийт 125 машин буюу 630 тн шарилж, луулийг  түүж ачуулсан байна.  Энэ ажилтай холбоотойгоор Чингэлтэй дүүрэг ургамлын тоосны харшилтай тэмцэх 2 сарын аян өрнүүлж Хан-Уул дүүрэг мал  бүхий зарим иргэдээ лууль шарилж түүн малын тэжээлдээ ашиглахыг сануулсан гэнэ.

Нийслэлийн удирдах ажилтны шуурхай зөвлөгөөний үеэр Нийслэлийн боловсролын газрын дарга Д. Энхбаяр  хичээлийн шинэ жилийн бэлтгэл ажилтай холбоотой мэдээлэл өглөө. 2010-2011 оны хичээлийн шинэ жилийн бэлтгэл ажлын хүрээнд улсын төсвийн хөрөнгөөр есөн сургууль, долоон цэцэрлэгт засвар хийгээд байна.  8 дугаар сарын 15 ны байдлаар засвар хийсэн цэцэрлэг,сургуулийн  арван гурвынх нь ажил дуусчээ.  Шинээр баригдаж буй  арван хоёр цэцэрлэгээс гадна таван цэцэрлэгт өргөтгөл хийснээр 1200 хүүхэд цэцэрлэгт нэмж хамрагдах боломжтой болж байна.

Энэ сарын 15 ны байдлаар нийслэл хотод өвөлжилтийн бэлтгэл ажил 79,4 хувьтай байна.  Өнгөрсөн жил улсын төсвийн хөрөнгө  оруулалтаар хийгдэж эхэлсэн дулааны шугмын засварын ажлын хоёрдугаар ээлж болох Их тойруугийн магистраль шугмын засвараас өчигдрийн байдлаар найман хэсгийн засварын ажил дуусчээ. Улаанбаатар хотын цахилгаан дамжуулах сүлжээнд хийгдэж 35 кв-ын агаарын шугам болон дэд станцуудад засвар шинэчлэлтийн ажлууд 83,8 хувьтай байна.  Мөн Ус сувгийн удирдах газраас бохир усны 148 км шугамд угаалга хийж,  Нийтийн аж ахуйг сайжруулах  төслийн хүрээнд  Баянхошууны хойд хэсэг, Дарь-Эх, Дамбадаржаагийн гэр хорооллын усан хангамжийн системийн туршилт тохируулгын ажлыг хийжээ.