“Азийн сантай хамтарч ажиллах талаараа бид дотооддоо ярилцаж эцэслэе” гэж Нийслэлийн Засаг дарга бөгөөд Улаанбаатар хотын Захирагч Г.Мөнхбаяр Азийн сангийн Монгол дахь газрын суурин төлөөлөгч Мелони Линдбергтэй уулзахдаа хэллээ.
Азийн хөгжлийн банк Улаанбаатар хотын хамтын ажиллагааг өргөжүүлэх, цаашдаа хэрхэн хамтарч ажиллахыг тодорхойлох зорилготой уулзалт болсон юм. Уулзалтад АНУ-ын Сан Франциско дахь Азийн сангийн төв оффисын ажилтан Аша Гош, Оливер Фетзолд нар оролцлоо. Тэд Улаанбаатар хотод долоо хоног ажиллана.

Нийслэлийн дэд бүтэц муутай, алслагдсан хороодын нэг болох Сонгинохайрхан дүүргийн 24 дүгээр хорооныхон халуун ус, угаалгын шинэ цогцолбортой боллоо. Энэхүү цогцолборыг Монгол Улсын Батлан хамгаалах яам, АНУ-ын Номхон далайн цэргийн командлалтай хамтран зохион байгуулж буй “Хааны эрэлд 2010” энхийг дэмжих ажиллагааны инженерийн хүмүүнлэгийн тусламжийн ажиллагааны сургалт, дадлагын хүрээнд барьж, өнөөдөр дүүргийнхэнд хүлээлгэн өглөө. “Халуун ус, угаалгын цогцолбор”-ыг АНУ-ын зэвсэгт хүчний инженерийн ротын 25, манай улсын Зэвсэгт хүчний 017 дугаар ангийн 30 орчим цэргийн албан хаагчид хамтран барьсан агаад АНУ-ын талаас 100 гаруй мянган ам.долларын тусламж үзүүлжээ.

Улаанбаатар хот даяар “Явган хүний зам” тохижилтын ажил өрнөхөөр боллоо. Нийслэлийн Засаг дарга Г.Мөнхбаяр захирамж гаргаж намрын тохижилтын ажлын хүрээнд нийслэлийн нутаг дэвсгэрт хүн амын эрүүл, аюулгүй орчинд амьдрах нөхцөлийг сайжруулах зорилготой уг арга хэмжээг эхлүүллээ. Гудамж талбайд явган хүний зам талбайг хааж, тэдгээрийн хөдөлгөөнд саад учруулахаар барьсан хашаа, хаалт, өргөтгөл, ТҮЦ, гарааш зэрэг байгууламжийн судалгааг гаргаж, зөрчил арилгуулах юм.
“Бидэнд ийм туршлага бий. “Хашаа” арга хэмжээг зохион байгуулсан нь Та бүхэн. Чөлөөлсөн газрыг ямар нэгэн зориулалтаар олгоогүй байгаа.

Хүн амын тал хувь нь амьдарч буй нийслэл ирэх жилийн өдийд спортын нэгдсэн цогцолбортой болно. Хан-Уул дүүргийн 1 дүгээр хорооны нутаг дэвсгэрт буюу Төв цэнгэлдэх хүрээлэнгийн баруун талд өнөөдөр энэхүү спорт цогцолборын барилгын шавыг тавилаа. Нийт 2,5 тэрбум төгрөг зарцуулах, 1000 гаруй хүний суудалтай спорт цогцолборын барилгыг “Үүрэг трейд” ХХК барих агаад 2011 оны 9 сард хүлээлгэж өгөх юм.
“Өөртөө спорт цогцолборгүй нийслэлийн байдлыг төр, засгаас анхаарч асуудлыг шийдвэрлэж өгсөн нь хүн амын эрүүл мэнддээ онцлон анхаарч буй чухал алхам юм. Цаашид дүүрэг бүрт спорт цогцолбор байгуулах агаад ингэснээр хүн амаа эрүүлжүүлэх, биеийн тамир спортоор хичээллүүлэх өргөн боломж бүрдэнэ” хэмээн тус цогцолборын шав тавих ёслол дээр Нийслэлийн Засаг даргын нэгдүгээр орлогч Б.Баатарзориг хэлсэн үгэндээ онцолсон байна.

Энэ жилийг бизнесийн орчны шинэтгэлийн жил болгон Засгийн газраас зарласан билээ.  Монгол Улсын Ерөнхий сайд ажлын хэсгийг ахалж  төрийн аливаа байгуулагууд   иргэд, аж ахуйн нэгжид хүндрэл чирэгдэлгүй, хүнд сурталгүй үйлчлэхийг гол  уриа болгож байна.  Энэ дагуу  Улаанбаатар хотын Захирагч ажлын хэсэг байгууллаа.  Ажлын хэсэгт багтсан нийслэлийн харьяа газрын удирдлага,  дүүргийн  дарга нарт бизнесийн орчны шинэтгэлийн жилтэй холбоотой  захирамжийг өнөөдөр хүргүүлж байна.   Захирамжид  аж ахуйн үйл ажиллагаа эрхлэх зөвшөөрөл,  зөвшөөрөл  олгохтой холбоотой  харилцааг зохицуулах эрх зүйн актыг  хянаж боловсронгуй болгох асуудал  багтсан байгаа. 

Улаанбаатар хоттой хамтран төсөл хөтөлбөр амжилттай хэрэгжүүлж яваа Японы Жайка олон улсын байгуулагын тэргүүн ноён Ишида Юкикогийн томилолтын хугацаа өндөрлөжээ. Манай улсад 2 жил 3 сар ажиллах хугацаандаа үр бүтээлтэй ажиллаж ялангуяа Улаанбаатар хотын хөгжилд үнэтэй хувь нэмэр оруулсанд хотын дарга Г. Мөнхбаяр талархаж ноён Ишида Юкикод  “Нийслэлийн хүндэт иргэн”-ий тэмдэг энгэрт нь зүүж өглөө.  Жайка байгуулага одоогоос 12 жилийн өмнө буюу 1998 онд орон сууцны  өрх айлуудын усны хэрэглээнд судалгаа хийсэн байдаг байна.  Тухайн үед орон сууцанд амьдардаг иргэд хоногт  580 литр ус зарцуулдаг гэдгийг Жайка тогтоожээ. 

Ж.Самбуугийн гудамж буюу “Зоос гоёл” компанийн хажуугийн уулзвараас Гэсэр сүмийн уулзвар хүртэлх гудамжны авто замын өргөтгөл шинэчлэлийн ажилтай холбогдуулан гэрэлтүүлгийн шонгуудыг буулгах ажлыг эхлэхээр боллоо. Нийслэлийн Засаг даргын орлогч Б.Мөнхбаатар тус замын ажилтай танилцахдаа ажилд саад болсон кабелийн шугамуудыг хэрхэх талаар холбогдох албаныхантай уулзах шийдвэр гаргаж хуралдсан. Энэ ажлыг хүрээнд тухайн хэсгийн гэрэлтүүлгийн шонгуудыг ашиглаж агаараар явсан кабель шугамуудыг энэ сарын 21-ны дотор буулгаж авахыг Нийслэлийн Захирагчийн ажлын алба, Авто замын газраас эзэмшигч, хариуцагч байгууллагуудад анхаарууллаа.

Нийслэлийн Захирагчийн ажлын албаны Хүнс худалдаа үйлчилгээний хэлтсээс эх орны гурилын үйлдвэрүүдтэй хамтран гурилыг үйлдвэрийн үнээр нь худалдаалах ажлыг нийслэлийн 6-н дүүрэгт зохион байгуулах гэж байна. Маргаашнаас эхлэн 9 дүгээр сарын 15-ныг хүртэлх хугацаанд нийт 13 цэгт гурилыг ямар ч нэмэгдэлгүй үйлдвэрийн үнээр нь борлуулах юм. Тухайлбал, нэгдүгээр гурил гэхэд кг нь 480 төгрөгөөр худалдаалагдах гэнэ. Гурилын үйлдвэрүүдийн шууд худалдаа Сонгинохайрхан дүүрэгт Баянхошууны шинэ эцэс, Цамбагарав үйлчилгээний төвийн урд талбай, Толгойт, Орбитын эцэс, Баянзүрх дүүрэгт Шархадны эцэс, Дарь-Эхийн эцсийн буудалд, Баянгол дүүрэгт 4 дүгээр хороолол “Смарт” худалдааны төв, 11 дүгээр хорооны баруун хойно байршилтай “Сантын гол” хүнсний дэлгүүрт, Хан-Уул дүүрэгт Нисэх болон Яармагийн эцсийн буудалд, Чингэлтэй дүүрэгт Хайлаастын шинэ эцэс, 9 дүгээр хороо Дэнжийн 1000-ын цагаан байрнуудын дунд, Дамбадаржаа дахь “Хан-Эрдэнэ” хүнсний дэлгүүрүүдэд тус тус болох юм.