Гэр хороолол гэхээр  хог, шороо хийссэн ахуй ихэнхдээ угтдаг бол тэр орчинд бүхэл бүтэн цэцэрлэгт хүрээлэн байгуулсан айл өрх ч  нийслэл хотод  цөөнгүй байна. Сүхбаатар дүүргийн 17 дугаар хорооны нутаг дэвсгэр Дамбадаржаад байх энэ айл  ажилсаг гэр бүл болохоо үүднээсээ л шуудхан илтгэв. Цэлгэрхэн хашаан дотор нүнжиг заасан хауз бариад зогсохгүй нүд унагах гол зүйл нь  Н.Батсүхийн хашаан доторх цэцэрлэг байсан юм.  Нийслэлийн 71 дүгээр дунд сургуульд слесарь ажилтай шавилхан залуу 20-иод жил ноцолдож байж энэ бүхнийг өнөөгийн түвшинд хүргэснээ хэллээ. Тэдний хашаанд 7-8 төрлийн жимсний мод ургаад зогсохгүй өнгө, үнэрээрээ арааны шүлс асгаруулж байлаа. Давжаа алим л гэхэд  идэхэд аль хэдийнэ бэлэн болжээ.

Улаанбаатар хотын Ерөнхий менежер бөгөөд Захирагчийн ажлын албаны дарга Ч.Бат зарим газруудын халаалтын зуухаар очиж, өвөлжилтийн бэлтгэл ажилтай нь танилцлаа. Ерөнхий менежерийн эхлээд очсон Халаалтын зуухны ашиглалт зохицуулалтын газрын харьяа Баянзүрх дүүргийн УС-15 нь 5 байрны 400 гаруй айл өрхийг халаалтаар хангадаг. Өнөө жил нийслэлээс 410 сая төгрөг гаргаж урсгал засвар болон гаднах талбайн 630 метр шугамыг шинэчлэн тавьснаар эндээс халаалтаа авдаг айл өрхүүд өвлийг өнтөй давах боломжтой болжээ.

Нийслэлийн Засаг даргын захирамжаар өмнө нь хувийн компаниудаар хийлгүүлдэг байсан нийслэлийн ногоон бүсийн ой цэвэрлэгээний ажлыг өнөө жилээс эхлэн Зэвсэгт хүчний анги салбараар гүйцэтгүүлэхээр болсон. Батлан хамгаалахын сайдтай байгуулсан хамтран ажиллах санамж бичгийн хүрээнд  Зэвсэгт хүчний 310 дугаар ангийнхан нийслэлийн ногоон бүсэд ой цэвэрлэх ажлыг эхлээд байна.
Нийслэлийн Байгаль хамгаалах газар болон Ойн газрын мэргэжилтнүүд цэвэрлэгээ хийж буй газарт очиж, хэрхэн огтлох, цэвэрлэгээг яаж явуулах талаар заавар зөвлөгөө өгч, сургалт зохион байгууллаа.

Нийслэлийн Засаг даргын санхүү, эдийн засгийн асуудал эрхэлсэн нэгдүгээр орлогч Б.Баатарзориг болон дүүргийн Засаг дарга нар амралтын өдрөөр Чингэлтэй дүүрэгт ажиллаж, тус дүүрэгт өрнөж буй бүтээн байгуулалтын ажилтай танилцлаа. Чингэлтэй дүүрэг нь 2010 онд тохижилт, бүтээн байгуулалтын томоохон ажлууд эхлүүлсний дотроос олон улсын жижигт нийцүүлэн, стандартын өндөр түвшинд тохижуулж буй “Тусгаар тогтнолын талбай”-н ажлын гүйцэтгэл 60 хувьтай байна. Нийслэлийн Засаг даргын санаачилсан энэхүү ажил ерөнхийдөө ирэх сард дуусах боловч тохижилтын ажлыг нь цаашид үргэлжлүүлэн гүйцэтгэх юм. Мөн Дорнын их яруу найрагч Б.Явуухулангийн нэрэмжит цэцэрлэгийн тохижилт ч амжилттай үргэлжилж байна. Урт настай, удаан эдэлгээтэй зүйл хийхийн тулд эдгээр бүтээн байгуулалтад байгалийн цэвэр чулуу ашиглаж байгаа гэдгээ дүүргийн удирдлага онцолж байсан.
Чингэлтэйнхэн иргэдийнхээ ая тухтай амьдрах орчныг бүрдүүлэх зорилгоор нийтийн эзэмшлийн гудамж, талбайг иж бүрэн тохижуулах, цэцэрлэгт хүрээлэн бий болгох, боловсролын хамрах хүрээг өргөтгөн сургалтын орчинг сайжруулах олон ажил хийж байгаагийн зэрэгцээ мэдээллийн нэгдсэн сүлжээнд холбох төслийн хүрээнд дүүргийн Засаг даргын Тамгын газар 19 хороог өндөр хурдны шилэн кабелиар холбосон байна.

Монгол Улсын Тамхины хяналтын тухай хуулийн хэрэгжилтийг сайжруулах, Нийслэлийн Иргэдийн Төлөөлөгчдийн Хурлын Тэргүүлэгчдийн тогтоолоор баталсан, Санаачилгыг дэмжих тухай,Тамхи худалдах үйл ажиллагааг эрхлэх тусгай зөвшөөрөл олгох, хяналт тавих журам, Нийслэлийн Засаг даргын, Тамхигүй орчин бүрдүүлсэн ажлын байр шалгаруулах хөдөлгөөн өрнүүлэн ажиллах, тухай захирамжийг танилцуулах уулзалт болло.  Нийслэлийн зарим харьяа газрын удирдлага, есөн дүүргийн Засаг дарга, Их, дээд сургуулиудын захирал оролцох аж. Корпорайт зочид буудлын 3 давхарт болох уулзалт 2010 оны есдүгээр сарын 3-нд болсон юм.