Нийслэл, дүүргүүдийн ЗДТГ-ын Цэргийн штаб 2020 онд дэвшүүлсэн “Хууль тогтоомж-иргэн цэргийн харилцааны жил”-ийн зорилгын хэрэгжилтийг ханган ажиллаж, жилийн эцсийн тайлангийн хурал хийлээ.Тайлангийн хуралд БХЯ-ны СБТГ-ын дарга хурандаа С.Ганбямба, Нийслэлийн ЗДТГ-ын Цэргийн штабын дарга хурандаа Ц.Анхбаяр, Нийслэл, дүүргийн ЗДТГ-ын Цэргийн штабын дарга, офицер, ахлагч нар цахимаар оролцов. Хуралдааны үеэр Нийслэлийн ЗДТГ-ын цэргийн штабын хамт олон “2020 оны тэргүүний Цэргийн штаб”-аар шалгарч, хүндэт өргөмжлөлийг гардан авлаа.

Коронавируст “Ковид-19” цар тахлын үед иргэдэд үзүүлэх тусламж, үйлчилгээг чанар хүртээмжтэй хүргэхийн төлөө тасралтгүй ажиллаж байгаа эмч, ажилчдынхаа дархлааг дэмжих, нийгмийн асуудлыг шийдвэрлэх чиглэлээр Нийслэлийн Энэрэл эмнэлгээс томоохон ажлуудыг өрнүүлж байна. Энэ хүрээнд нийт ажилчдын нийгмийн асуудлын судалгааг нарийвчлан хийж, ажлын үзүүлэлт, харилцаа хандлагаар хамт олноо манлайлан ажиллаж буй хоёр ажилтандаа өнөөдөр давхар туургатай, таван ханатай өргөө цагаан гэрийг гардуулан өглөө.

Сонгинохайрхан дүүргийн Засаг даргын тамгын газар, Дүүргийн Иргэдийн төлөөлөгчдийн хурал, гэмт хэргээс урьдчилан сэргийлэх салбар зөвлөлөөс ажил, үүргээрээ бусдыгаа манлайлсан гурван ахлагчийг өргөө цагаан гэрээр шагналаа. Эдгээр ахлагчид нь улиран өнгөрч буй 2020 онд Сонгинохайрхан дүүргийн цагдаагийн газрын 500 гаруй албан хаагчдын дундаас бусдыгаа хошуучлан, онцгой нөхцөлд үүргээ амжилттай биелүүлсэн албан хаагчид юм.

Сонгинохайрхан дүүргийн эрүүл мэндийн төвийн Баянхошуу амбулатори өнөөдөр ашиглалтад орлоо. Энэхүү эмнэлэг нь анх 1989 онд 35 ортой ашиглалтад орж үйл ажиллагаагаа явуулдаг байсан бол өнөөдөр 150 ортойгоор Сонгинохайрхан дүүргийн Баянхошуу бүсийн иргэдэд үйлчлэхээр үүд хаалгаа нээж байна

Нийслэлийн Засаг даргын Тамгын газрын Цэргийн штабаас 2020 оны ажлаа дүгнэн тайлангаа цахимаар хэлэлцэж, 2021 оны зорилго, зорилтуудаа тодотголоо. Цахим тайлангийн хуралд Нийслэлийн Засаг даргын Тамгын газрын Цэргийн штабын дарга хурандаа Ц.Анхбаяр, нийслэл дүүргийн цэргийн штабын бие бүрэлдэхүүн оролцлоо. Хурлын эхэнд Нийслэлийн Цэргийн штаб 2020 онд тавьсан зорилго, зорилтуудаа хэрхэн биелүүлж, ололт амжилттай ажилласан талаарх тайланг цахим хэлбэрээр танилцуулж 2020 оны ажилд хяналт шалгалт хийж, үнэлгээ өгснөө танилцууллаа.

Баянзүрх дүүргийн хэмжээнд коронавируст “Ковид-19” халдварыг илрүүлэх, тандах зорилгоор зохион байгуулж буй өргөтгөсөн шинжилгээнд нийт 58.522 хүнийг хамруулаад байна. Шинжилгээ хийх хугацааг гурван хоногоор сунгаж, энэ сарын 30 хүртэл авч буй бөгөөд нийт 19 цэг дээр өргөтгөсөн шинжилгээг зохион байгуулж байна. Баянзүрх дүүргийн иргэд та бүхэн шинжилгээнд идэвхтэй хамрагдан, коронавирусийн халдвараас сэргийлээрэй.

Өчигдрийн 18:00 цагаас өнөөдрийн 06:00 цагийн хооронд авто тээврийн шалган нэвтрүүлэх товчоодоор албан ажил, эмнэлэг, эрүүл мэнд, ахуйн гачигдал, оршин суух гэрийн хаягаар, хүнс, шатахуун тээвэрлэлт хийх зорилгоор нийт 1040 тээврийн хэрэгслээр 2133 зорчигч хот руу нэвтэрч, 923 тээврийн хэрэгслээр 1682 зорчигч хотоос гарсан байна.

2020 оны 12 дугаар сарын 29-ний өдрийн 08:00 цаг хүртэлх өнгөрсөн 24 цагийн хугацаанд нийслэлийн есөн дүүрэгт зохион байгуулж буй байнгын үйл ажиллагаатай болон Баянзүрх дүүрэгт нэмэлтээр гаргасан нийт 47 шинжилгээний төв, мөн тандалт, хариу арга хэмжээний 18 баг ажиллаж 13.420 хүнд коронавируст “Ковид-19” халдварын шинжилгээ хийлээ.

Жил бүр нийслэл Улаанбаатар хотынхоо хөгжил дэвшилд үнэтэй хувь нэмэр оруулж, хөдөлмөр зүтгэл, оюун ухаан, хөлс хүчээ зориулж, өргөсөн тангарагтаа үнэнч зүтгэн хийсэн ажлаараа хамт олон, дүүрэг хороо, хот нийслэлээ манлайлсан “Хөдөлмөрийн аварга”-уудаа тодруулдаг уламжлалтай. Уг арга хэмжээг Нийслэлийн Засаг даргын Тамгын газар, Нийслэл Улаанбаатар хотын Үйлдвэрчний эвлэлүүдийн холбоо, Монголын ажил олгогч эздийн нэгдсэн холбоо хамтран зохион байгуулдаг бөгөөд энэ жил коронавирусийн цар тахлаас ард иргэдээ хамгаалах үйлсэд хүчин зүтгэж буй 30 ажилтан, алба хаагч “Хөдөлмөрийн аварга” боллоо.

Баянзүрх нэгдсэн эмнэлэгт коронавируст “Ковид-19” халдварын голомт үүссэнтэй холбогдуулан Улсын онцгой комиссоос тус дүүрэгт 2020 оны 12 дугаар сарын 21-ний өдрөөс эхлэн 30-ны өдрийг дуустал 70.000-80.000 иргэнийг ПГУ /PCR/-ын шинжилгээнд хамруулж, тандалт хийхээр шийдвэрлэсэн.

Нийслэлийн удирдах ажилтнуудын шуурхай зөвлөгөөн өнөөдөр боллоо. Зөвлөгөөнөөр нийслэлийн өвөлжилтийн бэлтгэл ажил, дулаан, цахилгаан, сайжруулсан шахмал түлшний хангалт, түгээлтийн талаарх нөхцөл байдал, авч хэрэгжүүлсэн арга хэмжээний талаар холбогдох албаныхан мэдээлэл өглөө.

Нийслэлийн Засаг Даргын Тамгын Газар, Нэгдсэн Үндэстний байгууллагын хөгжлийн хөтөлбөр, Залуучуудын Youth: CO Lab төсөл, Нийслэлийн шинжлэх ухаан, үйлдвэрлэл, инновацын газар хамтран “Идэвхэжсэн 2030: Монгол Энтерпрайзинг эрэл” онлайн вебинарыг хоёр өдрийн турш амжилттай зохион байгууллаа. Уг вебинар 200 гаруй оролцогчтойгоор бүтэн дөрвөн цагийн хөтөлбөртэйгөөр үргэлжилсэн юм.

Нийслэл хотын хөгжил цэцэглэлтэд үнэтэй хувь нэмэр оруулж, хөдөлмөр бүтээлээрээ хамт олноо манлайлан, цар тахлын хүнд үед тэргүүн эгнээнд ажилласан нийслэлийн үйлчилгээний байгууллагуудын 2020 оны “Хөдөлмөрийн аварга”-ууд тодорлоо. Нийслэлийн аврах 105 дугаар ангийн аврагч Батбаярын Үнэнмөнх, Хот тохижилтын газар ОНӨААТҮГ-ын хог тээврийн автомашины жолооч Осорын Самданцэрэн, Сонгинохайрхан дүүргийн Замын цагдаагийн хэлтсийн замын зохицуулагч Батдэлгэрийн Баярхүү нарт Нийслэлийн Засаг дарга бөгөөд Улаанбаатар хотын захирагч Д.Сумъяабазар өргөмжлөл, шагналыг ажлын байран дээр нь биечлэн гардуулж өглөө. Мөн дээрх ажилтан, алба хаагчдын эрүүл, аюулгүй орчинд амьдрах нөхцлийг бүрдүүлэх болон нийгмийн асуудлыг шийдвэрлэх хүрээнд Нийслэлийн орон сууцны корпорациас хэрэгжүүлж буй “Орлогод нийцсэн орон сууц” хөтөлбөрийн түрээслээд өмчлөх хэлбэрийн орон сууцанд орох батламжийг олгосон юм.

Баянзүрх нэгдсэн эмнэлэгт коронавируст “Ковид-19” халдварын голомт үүссэнтэй холбогдуулан Улсын онцгой комиссоос тус дүүрэгт 2020 оны 12 дугаар сарын 21-ний өдрөөс эхлэн 30-ны өдрийг дуустал 70.000-80.000 иргэнийг ПГУ /PCR/-ын шинжилгээнд хамруулж, тандалт хийхээр шийдвэрлэсэн.

Сонгинохайрхан дүүрэгт 200 ортой жишиг эмнэлэг ашиглалтад ороход бэлэн боллоо. Тус эмнэлэг нь үндсэн 17, төрөлжсөн 11 төрлийн тусламж үйлчилгээг иргэдэд үзүүлэх хүчин чадалтай юм. Эмнэлэг ашиглалтад орсноор 157 мянган иргэн дэлхийн стандартад нийцсэн тав тухтай орчинд эрүүл мэндийн тусламж үйлчилгээг авах боломж бий болно. Мөн коронавирусийн халдварын тархалтын энэ үед тус эмнэлэг нь 100 орны хүчин чадалтайгаар тусгаарлалтын чиглэлээр бэлэн байдалд үйл ажиллагааг явуулах боломжтой.

Нийслэл хотод хөл хорио тогтоож, бүх нийтийн бэлэн байдлын зэрэгт шилжсэн эдгээр өдөр Нийтийн тээврийн үйлчилгээний газарт бүртгэлтэй такси үйлчилгээний аж ахуйн нэгжүүд ажиллаж буй. Нийт 503 такси үйлчилгээнд ажиллаж буй бөгөөд эдгээрт халдвар хамгааллын дэглэмийг сахиулах тусгай нөхцөл шаардлага тавьж байгаа юм. Мөн өглөө бүр үйлчилгээнд гарахаас өмнө тусгай зөвшөөрөл бүхий мэргэжлийн байгууллага цэвэрлэгээ, ариутгал халдваргүйжүүлэлтийг хийж байна.

Өнөөдөр өглөөний 08:00 цаг хүртлэх өнгөрсөн 24 цагийн хугацаанд Нийслэлийн авто тээврийн шалган нэвтрүүлэх есөн товчоонд эрүүл мэнд, онцгой, цагдаа, мал эмнэлэг, мэргэжлийн хяналтын 94 ажилтан алба хаагч үүрэг гүйцэтгэж байна.

Нийслэлийн нийтийн тээврийн үйлчилгээнд 19 байгууллагын 924 тээврийн хэрэгсэл ажиллаж байгаагаас их багтаамжийн 888, дунд багтаамжийн 36 автобус байгаа юм. Өнөөдөр 06:00-14:00 цагийн хооронд нийт 65368 зорчигч тээвэрлэлээ. Харин Баянзүрх дүүргийн нутаг дэвсгэрээр дайран өнгөрдөг чиглэлд нийтийн тээврийн үйлчилгээ эрхэлдэг 16 байгууллага, 483 тээврийн хэрэгсэл байна.