НИТХ-ын дарга Д.Баттулга 6 сарын 1-нд Японы сумогийн 71 дэх их аварга Мангалжалавын Анандыг хүлээн авч уулзан хүндэтгэл үзүүллээ.  Анх 16 настайдаа сумод барилдах хүсэлтээ илэрхийлэн захидал бичсэнээр Японыг зорьж , 13 жилийн дараа их аварга цол хүртсэн тухайгаа  М.Ананд ярилаа.
Тэрээр нийслэлийн Баянгол дүүргийн иргэн юм байна. НИТХ-ын дарга Д.Баттулга, “Нийслэлийн унаган иргэн Японы сумогийн дэвжээнд амжилттай барилдаж их аварга цол хүртсэнд баяртай байна. 

Улаанбаатар хотын Захирагчийн гэр хорооллын ажлын албадын дарга нар нийслэлийн яаралтай тусламжийн төвийн захирал Ц.Пүрэвдаш, дэд захирал Н.Ариунболд нартай уулзжээ.
 
Уулзалтаар Нийслэлийн 103 төвийн   яаралтай түргэн тусламжийн авто машинууд гэр хорооллын айл өрхийн дуудлагад явахад гудамж нь мухар, хаягжилт тодорхойгүй зэрэг хүндрэл учирдаг. Энэ нь түргэн тусламжийнхан айлдаа хүрч чадахгүй цаг алдах,  цаашилбал өвчтөний биеийн байдалд сөргөөр нөлөөлөх  хэмжээний хүндрэл учруулдаг. Тиймээс мухар гудамжинд амьдардаг, түргэн тусламжийн машин хүрэхгүй айл өрхүүдийн судалгааг гаргаж хамтарч ажиллахаар болсон байна.

“Гудамж” төслийн хүрээнд энэ онд хэрэгжүүлэх замын ажлын тоонд Сүхбаатар дүүргийн нутаг дэвсгэр дэх 100 айлын уулзварын өргөтгөл шинэчлэлийн ажил багтсан. Тэгвэл энэ ажлын зам барилгын гүйцэтгэгчээр “Паблик роуд” ХХК шалгарч, ажлаа эхлүүллээ. Уулзварыг өргөтгөтгөн шинэчлэхдээ зорчих хэсгийн эгнээг нэмэгдүүлэхээс гадна бүх чиглэлдээ саадгүй зорчих боломжтой болгож, хөдөлгөөний зохион байгуулалтад өөрчлөлт оруулна. Тодруулбал, 11 дүгээр хороолол болон 100 айл чиглэлээс аль ч тал руугаа гэрлэн дохиогоор хөндлөн нэвтрэх, 11 дүгээр хорооллоос Их тойруу чиглэлд, гүүртэй талаасаа 11 дүгээр хороолол чиглэлд тус тус зүүн гар тийш эргэх боломжтой болно. 

НИТХ-ын ээлжит 17 дугаар хуралдаанаар нийслэлийн орон сууцны хөтөлбөрийг хэлэлцэн баталлаа. Монгол Улсын Их Хурлын 2013 оны 23 дугаар тогтоолоор баталсан “Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 оны хүртэлх хөгжлийн чиг хандлагын баримт бичиг”, Монгол Улсын Их Хурлын 2010 оны 36 дугаар тогтоолоор баталсан “Шинэ бүтээн байгуулалт дунд хугацааны зорилтот хөтөлбөр”, Нийслэлийн Засаг дарга бөгөөд Улаанбаатар хотын Захирагчийн 2013-2016 оны үйл ажиллагааны хөтөлбөрийн “Иргэдийг орон сууцны зээлд хамруулж орон сууцжуулах нөхцөлийг бүрдүүлэх “Орон сууцны дэд хөтөлбөр”-ийг боловсруулж хэрэгжүүлнэ” гэх заалтыг хэрэгжүүлэх зорилгоор хөтөлбөрийг боловсруулжээ.

Нийслэлийн хэмжээнд хэд хэдэн байршилд зам барилгын ажил үргэлжилж байна.  Баянзүрхийн товчооноос Богд уулын араар Яармагийн гүүр хүрэх 17.6 км энэхүү авто замыг энэ оны 8 дугаар сарын 01-нд хүлээлгэж өгөх гэрээтэй юм. Зам барилгын ажлын хүрээнд өнөөдрөөс эхлэн  замыг хэсэгчлэн хааж хучих бөгөөд 2014 оны 5 дугаар сарын 30-наас Зайсан толгойн зүүн талаас Их тэнгэрийн амны зүүн тал хүрэх 2.2 км замыг 10 хоногийн хугацаатай хаахаар болсон. Зам хааж суурь хучилтын ажил гүйцэтгээд нээнэ. Энэ замаар хотын зүүн захаас Яармаг чиглэлд Богд уулын араар түгжрэлгүй шууд хүрэх боломжтой болно.  

Хүүхдийн эрхийг хамгаалах өдөр буюу 6 дугаар сарын 1-ний өдөр Замын цагдаагийн газрын алба хаагчид нь бүрэн бүрэлдэхүүнээрээ гудамж замд хяналт тавих, хөдөлгөөний аюулгүй байдлыг хангаж ажиллана. Хүүхдийн эрхийг хамгаалах өдөр хамгийн их ачаалал авдаг зам бол Нарны зам буюу Хүүхдийн соёл амралтын хүрээлэн, Үндэсний цэцэрлэгт хүрээлэн, Чингисийн талбайн баруун зүүн хоёр талын зам байдаг. Замын хөдөлгөөнд оролцож байгаа иргэдийг ая тухтай үйлчлүүлэх боломжийг хангах зорилгоор  Чингисийн талбайн баруун зүүн хоёр талын бүх төлбөртөй зогсоол ууд тухайн  өдөр  үнэ төлбөргүй  иргэдэд үйлчилнэ. 

Олон улсын хүүхдийн эрхийг хамгаалах өдрөөр хүүхэд, багачуудаа хоггүй цэвэр орчинд баярлуулах үүднээс 6-р сарын 1-ний өдөр нийслэлийн тохижилт үйлчилгээний “Улаанбаатар нэгтгэл”-ээс 40, нийслэлийн Хөдөлмөрийн газраас цагийн 20 ажилтан гарч,  зам талбайг цэвэрлэнэ. Маргааш өглөөнөөс эхлэн зам талбайг угааж, хогийн сав нэмж байрлуулах бөгөөд хог хаягдлыг 4 машинаар тээвэрлэхээр төлөвлөжээ.  Мөн талбайн өмнөх цэцэрлэгт зөөврийн нийтийн бие засах газрыг 4 цэгт байрлуулж, нийтэд үнэ төлбөргүй үйлчилнэ. 

Нийслэлийн замын сангийн хөрөнгө оруулалтаар 2014 онд хэрэгжүүлэх хотын гудамж, замуудын урсгал засварын /нөхөөс/ ажлыг “Нийтийн үйлчилгээний Улаанбаатар нэгтгэл” ОНӨААТҮГ хийж гүйцэтгэхээр 2014 оны 04 дүгээр сарын 18-ны өдөр гэрээ байгуулсан. Зам засварын ажил 2014 оны 05 дугаар сарын 23-наас эхэлсэн бөгөөд 07 дугаар сарын 01-ний дотор хийж гүйцэтгэж дуусах гэрээтэй.  

Улаанбаатар хотын Захирагчийн ажлын алба, Нийслэлийн нэгдмэл үйлдвэрчний эвлэлийн холбоод хамтран  тохижилт цэвэрлэгээ үйлчилгээний ажилтнуудын “Хөдөлмөр нийгмийн хамгаалалын чиглэлээр хамтран ажиллах” санамж бичигт гарын үсэг зурлаа.

НИТХ-ын ээлжит 17 дугаар хуралдаан өнөөдөр болж хуралдаанаар иргэдийн хөдөлмөр эрхлэлтийг дэмжих, амьжиргааг дээшлүүлэх зорилгоор боловсруулсан бичил бизнесийг дэмжих, ядуурлыг бууруулах хөтөлбөрийг хэлэлцлээ. Нийслэлийн Засаг даргын Хөдөлмөр эрхлэлт, нийгмийн хамгааллын асуудал хариуцсан орлогч Ц.Буяндалай хөтөлбөрийн талаар товч танилцуулахдаа,  нийслэлийн энэ оны төсөвт бичил бизнесийг дэмжих зорилгоор 15,2 тэрбум төгрөгийг суулгасан.  Бичил бизнесийг дэмжин зээл олгохдоо иргэддээ аль болох хүндрэлгүй уян хатан нөхцөлтэй байхаар боловсруулсан бөгөөд үндэсний үйлдэрлэлээ дэмжин, ажилгүйдлийг буурлуулах зорилгоор бичил бизнесийн зээл олгох сангийн журмын төслийг боловсруулсан гэдгийг онцоллоо.

Улаанбаатар хотын Захирагчийн ажлын алба, Монголын үсчин, гоо засалчдын мэргэжлийн холбоод хамтран дүүргүүдийн худалдаа үйлчилгээний хэлтсийн дарга , ахуйн үйлчилгээ хариуцсан мэргэжилтнүүд, нийслэлийн үсчин, гоо  сайхны салоны захирал, мастеруудын дунд сургалт зохион байгууллаа. Сургалтын үеэр эрэгтэй үс засалт, хуримын нүүр будалт, тайзны нүүр будалт, боди арт үзүүлбэр үзүүлсэн. Нээлтийг Захирагчийн ажлын албаны Хүнс, худалдаа үйлчилгээний  хэлтсийн дарга О.Нарантуяа нээсэн. 

Нийслэлийн Мэргэжлийн хяналтын газарт гаргасан иргэний гомдлын дагуу тус газраас Баянзүрх дүүргийн 4 дүгээр хороонд үйл ажиллагаа явуулж байгаа Сонгинохангай ХХК-ийн “Миний дэлгүүр” 102 худалдааны төвд худалдаалж байсан  байсан ОХУ-д үйлдвэрлэсэн загасны консерв /Сайра/ нэрийн 4680009030015, 14.12.13, цувралын дугаар болон хүчинтэй хугацаатай бүтээгдэхүүнд лабораторийн шинжилгээ хийжээ.

Жил бүрийн 6 дугаар сарын 1-нд тохиодог Олон улсын Хүүхдийн эрхийг хамгаалах өдрийг НЗДТГ-аас Чингисийн талбайд нэгдсэн байдлаар зохион байгуулах бол дүүрэг бүр өөр өөрсдийн сонгосон талбайд Хүүхдийн баярыг тэмдэглэнэ.

Нийслэлийн хэмжээнд автотээврийн болон өөрөө явагч хэрэгслийн албан татвар, агаарын бохирдол, автозам ашигласны төлбөр хураах ажил үргэлжилж байна. Тээврийн хэрэгслийн татвар, төлбөр хураах ажлын эхний шат 5 дугаар сарын 31-нд дуусна.  Албан татвар, төлбөрөө хуулийн хугацаанд төлөөгүй тээврийн хэрэгсэл эзэмшигч иргэн, аж ахуйн нэгж, байгууллагын дутуу төлөлтийг хураан барагдуулах, хариуцлага тооцох эрчимжүүлсэн хяналтын үзлэг, шалгалтыг 06 дугаар сарын 10-24-ныг хүртэл зохион байгуулах юм. Тиймээс энэ хугацаанд тээврийн хэрэгслийн татвар төлөлтийн явцыг сайжруулах, төрийн үйлчилгээг чирэгдэлгүй болгох зорилгоор Нийслэлийн мэдээллийн технологийн газар, Үндэсний Дата төвтэй хамтран тээврийн хэрэгслийн татвар хураамж, даатгал, үзлэг оношилгоо, бүртгэлийн нэгдсэн системийг боловсрууллаа.

Улаанбаатар хотын Захирагчийн ажлын алба, Байгаль орчин, ногоон хөгжлийн газар, Чингэлтэй дүүргийн Засаг даргын Тамгын газар, Сүхбаатар дүүргийн Засаг даргын Тамгын газар, Монголын оюутны холбоод хамтран зуслангийн бүсэд цэвэрлэгээ хийлээ. Цэвэрлэгээнд зуслангийн зам, Сэлбэ голын эрэг дагуу үүссэн хог хаягдлыг ”Citi” дээд сургууль, Батлан хамгаалахын их сургуулийн нийт 500-н оюутан, Чингэлтэй дүүргийн 19 дүгээр хорооны 10 хэсгийн ахлагч, 6 эко эргүүл, дүүргийн хог тээвэрлэгч байгууллага болох “Найши трейд” ХХК-ийн 21 ажилтан, Сүхбаатар дүүргийн “Эгэл амьдралын мөр” ТББ-ын түр ажлын байраар хангагдсан 20 иргэн 15, 19, 20 дугаар хороодын Засаг даргын ажлын албад бүрэн хамрагдлаа.

Баянзүрхийн товчооноос Богд уулын араар Яармагийн гүүр хүртэлх 17.6 км авто замыг шинээр барих ажил он дамжин хэрэгжиж байгаа юм. Тус зам барилгын ажлыг "ЭСТО" ХХК  гүйцэтгэж байгаа. Замын ажилтай холбогдуулан Зайсан толгойн зүүн талаас Их тэнгэрийн амны зүүн тал хүртэлх 2.2 км авто замыг 2014 оны 05 дугаар сарын 30-ны өдрөөс эхлэн 06 дугаар сарын 10 хүртэл 10 хоногийн турш хааж, хуучин асфальтбетон хучилтыг дахин боловсруулах, мөн замын суурь асфальтбетон хучилтыг дэвсэхээр болжээ. 

Нийслэлийн ИТХ-ын ээлжит XVII хуралдаан 2014 оны 5 дугаар сарын 29-нд болно. Хуралдаанаар Бичил бизнесийг дэмжих тухай, Нийслэлийн орон сууцны хөтөлбөр батлах тухай зэрэг асуудлыг хэлэлцэнэ.
Нийслэлээс анх удаа ажилгүйдлийг бууруулах, иргэдийн амьжиргааг дээшлүүлэх зорилгоор бичил бизнесийг дэмжих зээлийн хөтөлбөр боловсруулж, дүүргийн хүн амын тоонд дүйцүүлэн хороодод дунджаар 100-200 сая төгрөгийн төсөл хэрэгжүүлэхээр тооцож, энэ оны төсөвт 15.2 тэрбум төгрөгийг төсөвлөсөн юм.  Зээлийг олгохдоо  нөхцөлийг аль болох хялбарчилж, хүү бага, барьцаа уян хатан байхаар төлөвлөж байна. НИТХ-аар энэхүү асуудлыг хэлэлцэн, баталвал Бичил бизнесийн хөтөлбөрийг хэрэгжүүлэх тусгайлсан журамтай болох юм.

Нийслэлийн Засаг даргын тамгын газар 
06 дугаар сарын 01-нд 11: -16:00 цагийн хооронд “ХҮҮХДИЙН БАЯР” арга хэмжээ Чингис хааны нэрэмжит талбайд зохион байгуулна.
 
Үндэсний дуу бүжгийн эрдмийн чуулга
06 дугаар сарын 01-нйи өдрийн 10:00,12:00 цагуудаас Д.Ганболдын найруулга “Эрх цагаан унага” жүжгийг өөрийн тайзнаа тоглоно.