Н.Батаа: Хороо бүрт бичил зээлийн төсөл хэрэгжүүлэхээр 15,2 тэрбум төгрөг тусгаад байна

2013-11-25 00:00:00
Нийслэлийн 2014 оны төсвийн төслийг НИТХ-ын хороодын хуралдаанаар хэлэлцэн саналыг нэгтгэж байна. Өнгөрсөн долоо хоногт Хот байгуулалт дэд бүтцийн хороо, гэр хорооллын хөгжлийг дэмжих асуудал эрхэлсэн хорооны хамтарсан хуралдаан ,нийгмийн бодлогын хороо хуралдаж саналаа нэгтгэсэн бол өнөөдөр хууль зүй, төрийн байгуулалтын хороо, байгаль орчин экологи өргөдөл гомдлыг асуудал эрхэлсэн хороодын хамтарсан хуралдаанаар нийслэлийн ирэх оны төсвийг хэлэлцэнэ. Үүнтэй холбоотойгоор ирэх оны төсвийн талаарх зарим мэдээллийг Нийслэлийн Засаг даргын Санхүү эдийн засгийн асуудал хариуцсан  орлогч Н.БАТАА-гаас тодрууллаа.
 
-  Нийслэлийн 2014 оны төсвийг Пүрэв гарагт хэлэлцэн батлах гэж байна. Энэ жилийн төсөв ямар онцлогтой вэ?

-  2013 оны төсөв Улаанбаатар хотын бүтээн байгуулалтын хөрөнгө оруулалтруу чиглэсэн байсан бол 2014 оны хувьд иргэдрүүгээ чиглэсэн бодлого баримталж ажиллахаар төлөвлөж  байна. Үүний жишээ нь нэгдүгээрт нийслэл анх удаа “Иргэдийн оролцоотой төсөв-2014” компанит ажлыг зохион байгуулж, нийслэлийн 152 хороогоор дамжуулан 320 мянган айл өрхөөс ирэх оны төсөвт тусгах бүтээн байгуулалтын ажилд санал авлаа. Хэлэлцүүлгийн дүнд иргэд өөрсдийн хороонд хамгийн түрүүнд юу хийлгэх шаардлагатай байгааг нэгтгэж, түүний дагуу боломжтой гэж үзсэн төслүүдийг төсөвтөө суулгаад байна. Өөрөөр хэлбэл ирэх оны төсөв бол хотынх нь иргэд өөрсдөө саналаа оруулсан, төлдөг татварын мөнгөө юунд зарцуулахаа шийдсэн, хяналт тавьсан ийм төсөв болж байгаагаараа онцлог юм. Мөн 2014 оны төсөвт цоо шинээр нэг асуудал оруулж ирж байгаа нь Улаанбаатар хотын иргэдийн 60 гаруй хувийг орлого багатай иргэд эзэлж байгаа боловч эдгээр хүмүүст ямар нэгэн дэмжлэг байдаггүй. Тиймээс анх удаа төсвөөс бичил зээлийн төслийг бий болгож, 152 хорооны иргэдэд зориулан 15,2 тэрбум төгрөгийг төсөвлөхөөр төлөвлөөд байна. Хэрэв төлөвсөнөөр батлагдвал тухайн хороонд төсөвлөсөн хөрөнгийг иргэд өөрсдөө хувиарлаж, хяналт тавин зохицуулах, нийгэмд чиглэсэн ажил үйлчилгээ эрхэлж амьдралаа дээшлүүлэх боломжтой болж байгаа юм. Ингэснээрээ ажлын байр ч олноор бий болно. Мөн хот анх удаа жижиг дунд үйлдвэрлэлийг дэмжих санг бий болголоо. Энэ сан 5 тэрбум төгрөгийн төсөвтэй бөгөөд хотод шаардлагатай жижиг дунд үйлдвэрлэлүүдийг бий болгоход дэмжлэг үзүүлж, иргэдэд зээл олгоно. Гэх мэтчилэн иргэдрүү чиглэсэн олон төслийг хэрэгжүүлэхээр төсвөө боловсруулаад байна. Миний дээр дурдсан төсөл арга хэмжээнүүд бол нийслэлийн ирэх оны төсвийн 10 хувийг дангаараа эзэлж байна. Үүн дээр халамжийн сангийн бүх хөрөнгийг хот 100 хувь өөрөө гаргана. Энэ нь төсвийн 20 хувь буюу 83 тэрбум төгрөг болж байгаа юм. Харин хөрөнгө оруулалтын хэмжээ өнгөрсөн онд 228 тэрбум төгрөг байсан бол энэ жил 202 тэрбум болж буурсан байгаа. Мэдээж нийслэлийн Засаг даргын мөрийн хөтөлбөрт багтсан ажлуудыг хийж хэрэгжүүлнэ.

-  “Иргэдийн оролцоотой төсөв-2014” хэлэлцүүлгээс иргэдийн дийлэнх нь ямар санал гаргасан бэ?

-  Бид саналаа  гэр хороолол, орон сууцны хороолол гэж 2 төрлөөр авсан.  Үүнээс хамгийн их санал буюу 170 байршилд цэцэрлэг бариулахыг иргэд хүссэн. Мөн аюулгүй байдал чиглэлд камержуулах, тохь тухтай байх чиглэлд нийтийн эзэмшлийн зам талбайгаа цэцэрлэгжүүлэх, нийтийн үйлчилгээний чиглэлд автобусны буудал зогсоолуудыг оновчтой болгох шаардлагатайг иргэдийн өгсөн саналаас харж болно. Энэ бүгдийг хотын төсвийн болон орон нутгийг хөгжүүлэх сангийн хөрөнгөөр хийж гүйцэтгэхээр төлөвлөөд байна. Энэ жилийн хувьд орон нутгийг хөгжүүлэх сангийн хөрөнгө 13 тэрбумаар нэмэгдэж, 48 тэрбум төгрөгийн санхүүжилт авахаар болсон. Үүнийг дүүргүүдэд хувиарлаж иргэдээс ирсэн камержуулах, тоглоомын талбайг тохижуулах зэрэг саналыг шийдвэрлэнэ. Хамгийн чухал санал нь нийслэлийн хэмжээнд цэцэрлэг байгуулах шаардлагатай байна.  Иргэдийн санал, хэрэгцээ шаардлага, нийслэлийн Засаг даргын мөрийн хөтөлбөрийг үндэслэн ирэх онд цэцэрлэг, бага сургуулийн 17 цогцолбор шинээр барих ажлыг эхэлнэ. Харин улсын төсвийн хөрөнгөөр 11 цэцэрлэг, сургуулийн барилгын ажлыг үргэлжлүүлэн барьж ашиглалтад оруулахаар төлөвлөсөн. Түүнчлэн Дэлхийн банкны дэмжлэгээр 17 цэцэрлэгийн ажил эхэлсэн бөгөөд ирэх онд ашиглалтад оруулна. 80 бага сургууль цэцэрлэгийн цогцолборын хувьд Улсын төсвөөс 9 сургууль барих хөрөнгийг шийдвэрлэж өгсөн. Нийслэлийн ИТХ-ын 11 сарын 28-ны ээлжит хуралдаанаар нийслэлийн ирэх оны төсөв эцсийн байдлаар батлагдахаар нийслэлийн Засаг даргын захирамжийн дагуу нээлттэй ил тод мэдээлж, танилцуулах болно гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.